143 ಕೋಟಿ ರೂ. ಹೂಡಿಕೆ ವಂಚನೆ ಆರೋಪ; ಮೈ ಫಿಟ್ನೆಸ್‌ ಪ್ರವರ್ತಕರ ವಿರುದ್ಧದ ಎಫ್ಐಆರ್ ರದ್ದತಿಗೆ ಹೈಕೋರ್ಟ್ ನಕಾರ
- by Prashanth Basavapatna
- October 28, 2026
- 10 Views
ಬೆಂಗಳೂರು: ಮಧ್ಯಸ್ಥಿಕೆ ಪ್ರಕ್ರಿಯೆ ಅಥವಾ ರಾಷ್ಟ್ರೀಯ ಕಂಪನಿ ಕಾನೂನು ನ್ಯಾಯಮಂಡಳಿಯಲ್ಲಿ (ಎನ್‌ಸಿಎಲ್‌ಟಿ) ವಿಚಾರಣೆ ಬಾಕಿ ಇದೆ ಎಂಬ ಕಾರಣಕ್ಕೆ ವಂಚನೆ ಹಾಗೂ ನಂಬಿಕೆದ್ರೋಹ ಆರೋಪಗಳ ಕುರಿತು ನಡೆಯುತ್ತಿರುವ ಕ್ರಿಮಿನಲ್‌ ತನಿಖೆ ತಡೆಯಲು ಸಾಧ್ಯವಿಲ್ಲ ಎಂದು ಸ್ಪಷ್ಟಪಡಿಸಿರುವ ಹೈಕೋರ್ಟ್, ‘ಮೈ ಫಿಟ್ನೆಸ್‌’ ಬ್ರ್ಯಾಂಡ್‌ ನಿರ್ವಹಿಸುವ ತಾನ್ವಿ ಫಿಟ್ನೆಸ್‌ ಪ್ರೈ. ಲಿ. ಪ್ರವರ್ತಕರ ವಿರುದ್ಧದ ವಂಚನೆ ಪ್ರಕರಣದ ರದ್ದುಪಡಿಸಲು ನಿರಾಕರಿಸಿದೆ.
ಸಿಂಗಾಪುರ ಮೂಲದ ಮೆನ್ಸಾ ಬ್ರಾಂಡ್‌ ಪ್ರೈವೇಟ್ ಲಿಮಿಟೆಡ್‌ ಸಂಸ್ಥೆಯಿಂದ ಸುಮಾರು 143 ಕೋಟಿ ರೂ. ಹೂಡಿಕೆ ಪಡೆಯುವಾಗ ‘ಮೈ ಫಿಟ್ನೆಸ್‌’ ಟ್ರೇಡ್‌ಮಾರ್ಕ್‌ ಕುರಿತು ಇದ್ದ ಹಿಂದಿನ ಒಪ್ಪಂದವನ್ನು ಮರೆಮಾಚಲಾಗಿದೆ ಎಂಬುದು ಪ್ರಕರಣದ ಪ್ರಮುಖ ಆರೋಪವಾಗಿದೆ.
ಪ್ರಕರಣ ರದ್ದು ಕೋರಿ ಕಂಪನಿಯ ಮೊಹಮ್ಮದ್ ಅಬ್ಬಾಸ್‌ ನೌಶಾದ್‌ ಅಲಿ ಪಟೇಲ್‌ ಮತ್ತಿತರು ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರಿದ್ದ ಏಕಸದಸ್ಯ ನ್ಯಾಯಪೀಠ, ವಿವಾದವು ಮೇಲ್ನೋಟಕ್ಕೆ ಒಪ್ಪಂದಾತ್ಮಕ ಅಥವಾ ನಾಗರಿಕ ಸ್ವರೂಪದ್ದಾಗಿ ಕಾಣಿಸಿದರೂ, ಟ್ರೇಡ್‌ಮಾರ್ಕ್‌ ಹಕ್ಕುಗಳ ಕುರಿತು ತಪ್ಪು ಮಾಹಿತಿ ನೀಡಲಾಗಿದೆ ಹಾಗೂ ಪ್ರಮುಖ ಮಾಹಿತಿಯನ್ನು ಉದ್ದೇಶಪೂರ್ವಕವಾಗಿ ಮರೆಮಾಚಲಾಗಿದೆ ಎಂಬ ಆರೋಪಗಳಿರುವುದರಿಂದ ತನಿಖೆ ಅಗತ್ಯವಾಗಿದೆ ಎಂದು ಆದೇಶಿಸಿದೆ.
ಪ್ರಕರಣ ಸಂಬಂಧ 2026ರ ಮೇ 7ರಂದು ಎಫ್ಐಆರ್ ದಾಖಲಾಗಿದ್ದು, ಆ ನಂತರ ತನಿಖೆ ಬಹಳ ಪ್ರಾಥಮಿಕ ಹಂತದಲ್ಲಿದೆ. ಎಫ್ಐಆರ್ನಲ್ಲಿ ಎಲ್ಲ ಸಾಕ್ಷ್ಯಗಳು ಅಥವಾ ಪ್ರಕರಣದ ಸಂಪೂರ್ಣ ವಿವರಗಳನ್ನು ದಾಖಲಿಸಬೇಕೆಂಬ ನಿಯಮವಿಲ್ಲ. ತನಿಖೆಯ ಸಂದರ್ಭದಲ್ಲಿ ಪೊಲೀಸರು ಹೆಚ್ಚುವರಿ ದಾಖಲೆಗಳು, ಹೇಳಿಕೆಗಳು ಮತ್ತು ಇತರ ಸಾಕ್ಷ್ಯಗಳನ್ನು ಸಂಗ್ರಹಿಸಬಹುದು ಎಂದು ನ್ಯಾಯಪೀಠ ಹೇಳಿದೆ.
ಅರಿವಿನಲ್ಲಿರುವ ಅಪರಾಧದ ಮೂಲಭೂತ ಅಂಶಗಳು ಎಫ್ಐಆರ್ನಲ್ಲಿ ಕಾಣಿಸಿಕೊಂಡರೆ, ತನಿಖೆಯನ್ನು ಆರಂಭಿಕ ಹಂತದಲ್ಲೇ ತಡೆಯಬಾರದೆಂಬ ಸುಪ್ರೀಂಕೋರ್ಟ್‌ನ ಹಿಂದಿನ ತೀರ್ಪುಗಳನ್ನು ಉಲ್ಲೇಖಿಸಿರುವ ನ್ಯಾಯಾಲಯ, ಈ ಹಿನ್ನೆಲೆಯಲ್ಲಿ ಪೊಲೀಸರಿಗೆ ತನಿಖೆ ಪೂರ್ಣಗೊಳಿಸಲು ಅವಕಾಶ ನೀಡಿದೆ.
ಜತೆಗೆ, ಪ್ರಕರಣದಲ್ಲಿನ ಆರೋಪಗಳ ಸತ್ಯಾಸತ್ಯತೆ ಬಗ್ಗೆ ಯಾವುದೇ ಅಂತಿಮ ಅಭಿಪ್ರಾಯ ವ್ಯಕ್ತಪಡಿಸಿಲ್ಲ ಎಂದು ಸ್ಪಷ್ಟಪಡಿಸಿರುವ ಹೈಕೋರ್ಟ್, ತನಿಖೆಯ ಬಳಿಕ ಅಂತಿಮ ವರದಿ ಸಲ್ಲಿಸಿದ ಸಂದರ್ಭದಲ್ಲಿ ಆರೋಪಿಗಳಿಗೆ ಸೂಕ್ತ ಕಾನೂನು ವೇದಿಕೆ ಸಂಪರ್ಕಿಸುವ ಸ್ವಾತಂತ್ರ್ಯವಿರುತ್ತದೆ ಎಂದು ಆದೇಶದಲ್ಲಿ ತಿಳಿಸಿದೆ.
ಪ್ರಕರಣವೇನು?
ಮೆನ್ಸಾ ಸಂಸ್ಥೆ 2022ರಲ್ಲಿ ತಾನ್ವಿ ಫಿಟ್ನೆಸ್‌ನಲ್ಲಿ143 ಕೋಟಿ ರೂ. ಹೂಡಿಕೆ ಮಾಡಿತ್ತು. ಆ ಹೂಡಿಕೆಯ ಮೂಲಕ ಮೆನ್ಸಾಗೆ ಕಂಪನಿಯಲ್ಲಿ ಶೇ. 51.66 ನಿಯಂತ್ರಣ ಹಂಚಿಕೆ ದೊರಕಿತ್ತು ಎಂದು ವರದಿಯಾಗಿದೆ. ಹೂಡಿಕೆ ಮಾಡುವ ಸಂದರ್ಭದಲ್ಲಿ ತಾನ್ವಿ ಫಿಟ್ನೆಸ್‌ ಪ್ರವರ್ತಕರು ‘ಮೈ ಫಿಟ್ನೆಸ್‌’ ಟ್ರೇಡ್‌ಮಾರ್ಕ್‌ನ ಮೇಲೆ ಎಲ್ಲ ವಾಣಿಜ್ಯ ವರ್ಗಗಳಲ್ಲಿಯೂ ನಿರ್ಬಂಧರಹಿತ ಮಾಲೀಕತ್ವವಿದೆ ಎಂದು ಹೇಳಿದ್ದರೆಂದು ಮೆನ್ಸಾ ಆರೋಪಿಸಿದೆ.
Comments (0)