ಖಾಸಗಿ ಕಂಪನಿಗೆ ಕೆಎಸ್‌ಪಿಸಿಬಿ ನೀಡಿದ್ದ ₹ 12.69 ಕೋಟಿ ಡಿಮಾಂಡ್ ನೋಟಿಸ್ಗೆ ಹೈಕೋರ್ಟ್ ತಡೆಯಾಜ್ಞೆ
- by Prashanth Basavapatna
- November 19, 2025
- 70 Views
ಬೆಂಗಳೂರು: ರಿಯಲ್‌ ಎಸ್ಟೇಟ್‌ ಅಭಿವೃದ್ಧಿ ಯೋಜನೆಗಳಲ್ಲಿ ತೊಡಗಿಸಿಕೊಂಡಿರುವ ‘ರಾಮ್‌‌ಕಿ ಎಸ್ಟೇಟ್ಸ್‌ ಆ್ಯಂಡ್‌ ಫಾರ್ಮ್ಸ್‌ ಲಿಮಿಟೆಡ್‌’ ಕಂಪನಿಗೆ 12.69 ಕೋಟಿ ರೂ. ಪರಿಸರ ಪರಿಹಾರ ಪಾವತಿಸುವಂತೆ ಕರ್ನಾಟಕ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿ(ಕೆಎಸ್‌ಪಿಸಿಬಿ) ಹೊರಡಿಸಿದ್ದ ಡಿಮಾಂಡ್ ನೋಟಿಸ್ಗೆ ಹೈಕೋರ್ಟ್ ಮಧ್ಯಂತರ ತಡೆ ನೀಡಿದೆ.
ಕೆಎಸ್‌ಪಿಸಿಬಿ 2025 ಅಕ್ಟೋಬರ್ 16ರಂದು ನೀಡಿದ್ದ ನೋಟಿಸ್‌ ಪ್ರಶ್ನಿಸಿ ಕಂಪನಿ ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನಡೆಸಿದ ಮುಖ್ಯ ನ್ಯಾಯಮೂರ್ತಿ ವಿಭು ಬಖ್ರು ಹಾಗೂ ನ್ಯಾಯಮೂರ್ತಿ ಸಿ.ಎಂ.ಪೂಣಚ್ಚ ಅವರಿದ್ದ ವಿಭಾಗೀಯ ನ್ಯಾಯಪೀಠ ಈ ಮಧ್ಯಂತರ ಆದೇಶ ಮಾಡಿದೆ. ಇದೇ ವೇಳೆ, ಕೆಎಸ್‌ಪಿಸಿಬಿ ಸೇರಿ ಎಲ್ಲ ಪ್ರತಿವಾದಿಗಳಿಗೆ ನೋಟಿಸ್‌ ಜಾರಿಗೊಳಿಸಿದ ನ್ಯಾಯಪೀಠ ವಿಚಾರಣೆಯನ್ನು 2026ರ ಫೆಬ್ರವರಿ 2ಕ್ಕೆ ಮುಂದೂಡಿದೆ.
ಕಂಪನಿಯ ಆಕ್ಷೇಪವೇನು?
ವಿಚಾರಣೆ ವೇಳೆ ವಾದ ಮಂಡಿಸಿದ್ದ ಕಂಪನಿಯ ಪರ ವಕೀಲರು, ಮಾಲಿನ್ಯ ನಿಯಂತ್ರಣ ಮಂಡಳಿಗಳು ನೀರು ಮತ್ತು ವಾಯು ಕಾಯ್ದೆಗಳ ಸೆಕ್ಷನ್‌ 33ಎ ಮತ್ತು 31ಎ ಅಡಿಯಲ್ಲಿ ತಮ್ಮ ಅಧಿಕಾರ ಚಲಾಯಿಸುವಾಗ ಸಂಭಾವ್ಯ ಪರಿಸರ ಹಾನಿಗೆ ಪೂರ್ವಭಾವಿ ಕ್ರಮವಾಗಿ ನಿಗದಿತ ಮೊತ್ತದ ಹಣವನ್ನು ಅಥವಾ ಬ್ಯಾಂಕ್‌ ಗ್ಯಾರಂಟಿಗಳನ್ನು ಒದಗಿಸುವ ಅಗತ್ಯವನ್ನು ಮರುಪಾವತಿ ಮತ್ತು ಪರಿಹಾರದ ರೂಪದಲ್ಲಿ ವಿಧಿಸಬಹುದು ಮತ್ತು ಸಂಗ್ರಹಿಸಬಹುದು ಎಂದು ದೆಹಲಿ ಮಾಲಿನ್ಯ ನಿಯಂತ್ರಣ ಸಮಿತಿ ಹಾಗೂ ಲೋಧಿ ಪ್ರಾಪರ್ಟಿ ಕಂಪನಿ ಲಿಮಿಟೆಡ್‌ ನಡುವಿನ ಪ್ರಕರಣದಲ್ಲಿ ಸುಪ್ರೀಂಕೋರ್ಟ್‌ ಹೇಳಿದೆ. ಆದರೆ ಅದಕ್ಕೆ ಸಂಬಂಧಿಸಿದಂತೆ ಅಧೀನ ಶಾಸನದ ಮೂಲಕ ನಿಯಮಗಳನ್ನು ರೂಪಿಸಬೇಕಿತ್ತು. ಆ ರೀತಿ ನಿಯಮಗಳನ್ನು ರೂಪಿಸದೆ ಪರಿಹಾರ ಸಂಗ್ರಹ ಮಾಡುವ ಅಧಿಕಾರ ಮಂಡಳಿಗಿಲ್ಲ ಎಂದು ಆಕ್ಷೇಪಿಸಿದರು.
ಮಂಡಳಿ ನೀಡಿರುವ ಡಿಮಾಂಡ್ ನೋಟಿಸ್‌ ಸಂಪೂರ್ಣವಾಗಿ ಅಧಿಕಾರ ವ್ಯಾಪ್ತಿ ಮೀರಿದೆ. ಮಂಡಳಿಯಿಂದ ನಿರ್ವಹಿಸಲ್ಪಡುವ ಮೂಲ ಕಾನೂನುಗಳಾದ ಜಲ (ಮಾಲಿನ್ಯ ತಡೆಗಟ್ಟುವಿಕೆ ಮತ್ತು ನಿಯಂತ್ರಣ) ಕಾಯ್ದೆ 1974, ವಾಯು (ಮಾಲಿನ್ಯ ತಡೆಗಟ್ಟುವಿಕೆ ಮತ್ತು ನಿಯಂತ್ರಣ) ಕಾಯ್ದೆ 1981 ಅಥವಾ ಪರಿಸರ (ರಕ್ಷಣೆ) ಕಾಯ್ದೆ 1986ರ ಅಡಿಯಲ್ಲಿ ಜಾರಿಗೆ ತರಲಾದ ಯಾವುದೇ ಕಾನೂನುಗಳು ಅಥವಾ ಅಧೀನ ಕಾನೂನುಗಳು ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿಗೆ ಹಣಕಾಸಿನ ಪರಿಹಾರ ನಿರ್ಣಯಿಸಲು, ಪ್ರಮಾಣೀಕರಿಸಲು ಅಥವಾ ವಸೂಲಿ ಮಾಡಲು ಅಧಿಕಾರ ನೀಡಿಲ್ಲ ಎಂದು ನ್ಯಾಯಪೀಠಕ್ಕೆ ವಿವರಿಸಿದರು.
Comments (0)